Galatians 6

umbai-yántááꞋó kwáyaindawai túwaꞋnaa oro siráin-kwasai.

1kesí kwaásiyono. keinárawapinkembo évakarawaimo sáwíꞋo kwéombo ésa kwétuwanaamba pósa keinárawapinkemba Áánútun-amankomo sintembó mirámó kwéowai kwempaꞋá arupí umátinkanaaowe. kegwáráꞋá mirá-sáwíꞋá ónááovo kárákwiyoro. 2umbai-yántááꞋó kwáyaindawai túwaꞋnaa oro. mirámó éꞋo éꞋa Ísu Káráísiti siráiniꞋa mirá ónááowe. 3úwoi-kwaasigomo anón-kwaasi únemo sínímba minímáyááó kampaꞋá simáuwaniye. 4kentí mayáí awánéꞋa kaweꞋ-máyáímó kwáyainaꞋo éꞋa aamoí éꞋa óꞋowiti mayáíyávéꞋa kesí mayáígó usáyaaitaraiye íma seró. 5amáparawaitopaꞋa umbai-yántááꞋá tínímbanivo íma ivátuweꞋa asiramái méꞋa moórá-morawai túwaꞋnaa oro.

6Áánútuna áséi-kwasai ísámae kwéiyowai miwítí kawe-tántááꞋá amápaꞋa taaímbai évaka-tantaaꞋa Áánútun-aai kwésimatimewaitopaꞋa tímaꞋmaeꞋa íyóro.

7íma kanaán-umai Áánútumba kampaꞋá simáuwanaaovo árair-aimban-ivo íma moórá-imayaa oro. kawer-ánáyúmbó úmáráawaimo ombá kawe-tómbá kwéakaraavo sáwí-anayumbo úmáráawaimo ombá sáwí-tomba kwéakaraawe. 8mirámó kwéomba sáwí-yantaatavesa tirááíyavaiye suꞋmai úmae kwéiyowai mirámó kwéowaina anondáma puwésa Áánútuna egwaaꞋá íma ménaaomba pósa némpaꞋa ménaaovo Áánútun-amankombo arááímo tainíꞋa úmae kwéiyowai mirámó kwéowaina anondáma aúnáiꞋa umái maíꞋmaiꞋa ónááaowe. 9mindáyaveta kesáá kaweꞋá úmaeta kwéiyundaya íma sívón-káínata ivátúwáano. kaweꞋó úmaetaamo kwéiyundayaamo ímo sívón-káínataamo tuwétaamo éta naaén-kanaamo tínímba kaweꞋ-méyántá maéta ménaumne. 10mindáyaveta túwaꞋnaa onda-ámbó kwáyáimbo éta amáparawai kaweꞋá umáíya túwaꞋnaa ono. Áánútun-aaiyavesamo árairemo kwésewaiseya mimbórá-ákúníꞋa umái méta túwaꞋnaayaamo ónaundaya mindá anón-tantaaꞋan-iye.

11ayááíráꞋá kemá Póro anón-auvaivimba agaimaráúmpo awánéꞋa kwenayáánaviꞋan-iye seró. 12évakarawai sésa suwánésa anón-kwaasiman-owe sígwáe kwésewai keinárawatavesa sésa túraꞋa kárámai araaꞋéna oro kwésewana miwí tááigo keinárawaꞋa kwétavisiye. Ísu Káráísiti keinárawatavaiye séna taairaꞋá pukáiye-aine suꞋmaimo senkákáí évakarawai ísámai sáwíꞋa umátínkáasino. ímo sáwíꞋo umátinkanaaontavesa sésa túraꞋa kárámai araaꞋéna oró-áínkwáráꞋá kwésewe. 13túraꞋa kárámai araaꞋéna orómó kwésewai Mósesimo siráin-amaamba íma amápaꞋa kwégwaraawe. kentúraꞋo araaꞋénamo mósá úmaranaaontavesa túma kárámai araaꞋéna ígwáe kwésewe. 14miwí mirá kwésevo kemá Póro mimbórá-áímbá mósá maréꞋa Ísóigo Ísu Káráísiti kentááyáváíyé séna taairaꞋá pukáiye-aimba mósá kwémaraumne. Ísu Káráísiti kentááyáváíyé séna pukáintaveꞋa púwón-kwaasimo marapá-tántáátávésamo ímo imáyáamo ontembá marapá-tántáátávéꞋa íma imáyáa éꞋa úwoisamban-iye kwésunda póna mintántáákó kembá íma kwétavisiye. 15moóráwaimo áúraꞋo kárámaimo araaꞋéna ínanamo moóráwaimo ímo áúraꞋo kárámaimo araaꞋéna ínanamo ínímba mindá íma anón-tantaaꞋan-ivo Áánútu aúná-kwaasiraaniꞋo umásínkaraimba mindá anón-tantaaꞋan-iye. 16simátimunda-aimbo kwaꞋmaé iyíyanamo éna Áánútu paru umái arumbá umátinkena kwená kwaási amápaꞋa mirá umátinkaniye.

17Ísun-aai simátimewandarakemba sínkamuwana avimá sineꞋá kwáyáintaveꞋa Ísu Káráísitina mayáí-kwáásí óne kwésevo moórá-umbai-yantaaꞋa íma síméro.

kesí kwaásiyono. Ísóigo Ísu Káráísiti keinárawate ména úwoi kwétuwaꞋnaa-isaꞋa árair-aimban-iye séꞋa námúnaa kwésune.

kemá Póro súnda-aimba ánásaiye.

18